腦癇症? 我無喎! 都唔關我事。我未試過突然暈低抽筋，有必要認識嗎?
相信好多人都有呢種諗法，但係，其實腦癇症頗為普遍，發作時可以有好多唔同表現，並唔係大家想像中咁簡單。佢係香港第四位最常見的腦科疾病，據估計，全港約有7萬人患有此症。
隨便google一下名人患者。嘩! 真係唔講得笑。
計有阿里士多德、達文西、凡高、阿歷山大大帝、拿破崙、查理士狄更斯、牛頓、貝多芬、諾貝爾、洪秀全、柴可夫斯基、米高安哲羅、蘇格拉底、柏拉圖……
究竟佢地係咪全部真係有腦癇症? 年代久遠，恐怕要經過嚴謹的歷史考證先證實到。事實上，美國依利諾大學醫學院腦神經科的學者就曾認真研究過呢個問題，最後認為當中好多歷史名人只係曾經出現類似發作，並唔係真正患上腦癇症，而係有其他病因。
姑勿論如何，近代承認自己患有腦癇症或普遍相信患病的名人亦不計其數，包括有美國歌手Prince、英國歌手Elton John、前美國總統羅斯福等等。
唔講唔知，原來在香港，每20人當中，就有一人在一生中會有腦癇發作，因此，你我都可以係二十分之一! 亦有研究話，患有高血壓、糖尿病、中風、失智症及吸煙人士，就更高機會會患上。所以，大家都應該正確認識腦癇症，多加留意相關資訊。
參考資料:
[1] 12 Famous Faces of Epilepsy
[2] Rewriting History: Did All Those Famous People Really Have Epilepsy?
免責聲明：此資訊及圖像只作一般教育用途及供參考之用，如有需要，請向相關專業人士作進一步查詢。